کوالالمپور: تھائی لینڈ اور ملائیشیا کی سرحد کے قریب تارکین وطن سے بھری ایک کشتی کے الٹنے سے ہولناک سانحہ پیش آیا جس میں کم از کم 7 افراد ہلاک ہوگئے جبکہ درجنوں لاپتا ہیں۔
غیرملکی میڈیا کے مطابق کشتی میں تقریباً 300 افراد سوار تھے جن میں سے محض 10 افراد کو زندہ بچایا جاسکا ہے۔ زندہ بچ جانے والوں میں تین میانماری، دو روہنگیا اور ایک بنگلہ دیشی شامل ہیں۔
حکام کے مطابق یہ کشتی تین روز قبل میانمار کے علاقے بوٹھی داونگ سے روانہ ہوئی تھی۔ تحقیقات سے پتہ چلا ہے کہ اسمگلروں نے مسافروں کو بڑی کشتی سے تین چھوٹی کشتیوں میں منتقل کیا تھا جس کے بعد یہ حادثہ پیش آیا۔
