کراچی: جناح پوسٹ گریجویٹ میڈیکل سینٹر (جے پی ایم سی) کے ایگزیکٹو ڈائریکٹر اور معروف سرجن ڈاکٹر شاہد رسول 59 برس کی عمر میں دل کا دورہ پڑنے کے باعث انتقال کر گئے۔ اسپتال کے ذرائع اور ان کے ساتھیوں نے ان کے انتقال کی تصدیق کی۔

ڈاکٹر شاہد رسول ایک نامور معالج تھے اور انہیں رائل کالج آف فزیشنز اینڈ سرجنز (گلاسگو) کے لیے پاکستان کا بین الاقوامی مشیر بھی مقرر کیا گیا تھا۔ وہ طبی تعلیم، تحقیق اور مریضوں کی خدمت کے لیے اپنی زندگی وقف کیے ہوئے تھے۔

وزیراعلیٰ سندھ سید مراد علی شاہ نے ان کے انتقال پر گہرے دکھ کا اظہار کرتے ہوئے کہا کہ ڈاکٹر شاہد رسول ملک کے بہترین سرجنز میں شمار ہوتے تھے اور ان کی خدمات ہمیشہ یاد رکھی جائیں گی۔ وزیراعلیٰ نے مرحوم کے لیے دعائے مغفرت کی اور لواحقین سے تعزیت کی۔

سندھ کے سینئر وزیر شرجیل انعام میمن نے ڈاکٹر رسول کو باصلاحیت، فرض شناس اور انسان دوست معالج قرار دیتے ہوئے کہا کہ ان کی خدمات محکمہ صحت اور شعبہ طب کے لیے ناقابل فراموش ہیں۔ وزیر صحت ڈاکٹر عذرا پیچوہو نے بھی ان کے انتقال پر افسوس کا اظہار کرتے ہوئے کہا کہ ڈاکٹر شاہد رسول نے جے پی ایم سی کی سربراہی لگن اور خدمت کے جذبے کے ساتھ کی اور عوامی صحت کے لیے ان کی خدمات ہمیشہ یاد رکھی جائیں گی۔