کراچی: وفاقی وزیر برائے سرمایہ کاری اور مسلم لیگ ن کے رہنما قیصر احمد شیخ نے کہا ہے کہ اتحادی جماعت پاکستان پیپلز پارٹی سرکاری اداروں کی نجکاری کے عمل میں سب سے بڑی رکاوٹ ہے۔
ایک تقریب سے خطاب کرتے ہوئے انہوں نے کہا کہ پیپلز پارٹی سے نجکاری کے معاملے پر مذاکرات جاری رہتے ہیں، لیکن اگر اسے ناراض کیا گیا تو حکومت قائم رکھنا مشکل ہو جائے گا۔ ان کا کہنا تھا کہ پیپلز پارٹی نجکاری کے خلاف اپنے منشور پر قائم ہے، یہی وجہ ہے کہ نجکاری کا عمل آگے نہیں بڑھ پا رہا۔
قیصر احمد شیخ نے مزید کہا کہ یہ کوئی نئی بات نہیں کیونکہ پیپلز پارٹی ہمیشہ سے نجکاری کے خلاف رہی ہے، جبکہ مسلم لیگ ن کی پالیسی ہمیشہ پرائیویٹائزیشن کے حق میں رہی ہے۔
پاکستان میں نجکاری کا عمل کئی دہائیوں سے سیاسی اختلافات کا شکار رہا ہے۔ مسلم لیگ ن نے ماضی میں مختلف اداروں کی نجکاری کی کوششیں کیں، جن میں بینکنگ، توانائی اور ٹیلی کمیونیکیشن کے شعبے شامل تھے۔ دوسری جانب پیپلز پارٹی نے ہمیشہ سرکاری اداروں کو عوامی ملکیت میں رکھنے پر زور دیا ہے، جسے وہ عوامی مفاد اور روزگار کے تحفظ کے لیے ضروری سمجھتی ہے۔ موجودہ حکومت میں دونوں جماعتوں کے درمیان اس پالیسی اختلاف نے نجکاری کے عمل کو مزید پیچیدہ بنا دیا ہے۔
