اسلام آباد: وزیر دفاع خواجہ آصف نے کہا ہے کہ پاکستان تحریک انصاف (پی ٹی آئی) کے بھگوڑے پہلے ملک کو لوٹتے رہے اور اب بیرون ملک بیٹھ کر پاکستانیوں سے پیسے بٹور کر پرتعیش زندگی گزار رہے ہیں۔ انہوں نے چیلنج کیا کہ اگر جرات ہے تو پاکستان آکر سیاسی جنگ لڑیں۔
سماجی رابطے کے پلیٹ فارم ’ایکس‘ پر اپنے بیان میں خواجہ آصف نے کہا کہ یہ عناصر یورپ میں جی ایس پی پلس کی سہولت کے خلاف مہم چلا کر پاکستان کے مفادات کو نقصان پہنچا رہے ہیں، جو کھلی غداری ہے۔ ان کے مطابق پاکستان کی لڑائیاں پاکستان کی سرزمین پر لڑنی چاہئیں۔
خواجہ آصف نے کہا کہ بے نظیر بھٹو شہید اور نواز شریف دونوں نے سیاست میں سخت آزمائشیں برداشت کیں، قید کاٹی، ان کے اہلِ خانہ اور کارکنان کو ظلم کا نشانہ بنایا گیا، مگر کسی نے وطن کے مفادات کو نقصان پہنچانے کا نہیں سوچا۔ انہوں نے کہا کہ دونوں رہنماؤں نے سیاسی لڑائی پاکستان میں لڑی اور اس کی قیمت بھی ادا کی، لیکن قومی مفاد پر آنچ نہیں آنے دی۔
وزیر دفاع نے الزام لگایا کہ عمران خان اور ان کے ساتھی اقتدار سے محروم ہونے کے بعد پہلے آئی ایم ایف کو خط لکھ کر پاکستان کو دیوالیہ کرنے کی کوشش کرتے رہے اور اب برآمدات کو نقصان پہنچانے کے لیے بیرون ملک لابنگ کر رہے ہیں۔
خواجہ آصف نے کہا کہ اگر یہ سب کچھ بھارت کرے تو سمجھ آتی ہے، لیکن جب خود کو پاکستانی کہنے والے ایسا کریں تو وہ ننگِ وطن اور غدار کہلائیں گے۔
جی ایس پی پلس (GSP+) یورپی یونین کا ایک تجارتی پروگرام ہے جس کے تحت پاکستان کو یورپی منڈیوں میں ڈیوٹی فری رسائی حاصل ہے۔ یہ سہولت پاکستان کی برآمدات، خاص طور پر ٹیکسٹائل انڈسٹری کے لیے نہایت اہم ہے۔ ماضی میں بھی سیاسی تنازعات کے دوران اس سہولت کو خطرات لاحق رہے ہیں، تاہم حکومت پاکستان ہمیشہ اس کے تحفظ کے لیے سفارتی کوششیں کرتی رہی ہے۔ خواجہ آصف کے حالیہ بیان کا مقصد بیرون ملک جاری ان سرگرمیوں کو روکنے کی اپیل ہے جو پاکستان کی معیشت اور برآمدات کو نقصان پہنچا سکتی ہیں۔
