اسلام آباد: پاکستان تحریک انصاف کے سیکرٹری جنرل سلمان اکرم راجا اور کور کمیٹی کی رکن سینیٹر مشال یوسف زئی کے درمیان اختلافات ایک بار پھر سامنے آگئے ہیں۔
ذرائع کے مطابق تحریک انصاف کے پارلیمانی پارٹی اجلاس میں دونوں رہنماؤں کے درمیان سخت جملوں کا تبادلہ ہوا۔ مشال یوسف زئی نے اجلاس میں یہ معاملہ اٹھایا کہ بانی پی ٹی آئی کی باتیں اور پیغامات درست انداز میں باہر نہیں پہنچ رہے۔
ذرائع کا کہنا ہے کہ مشال یوسف زئی نے الزام لگایا کہ سلمان اکرم راجا بانی پی ٹی آئی کا پیغام صحیح طور پر نہیں پہنچا رہے، جس پر سلمان اکرم راجا نے ان الزامات کو جھوٹ قرار دیا۔ انہوں نے کہا کہ ملاقاتیں محدود ہوتی ہیں اور جو افراد پیغام پہنچانے کے ذمہ دار ہیں وہی درست معلومات فراہم کرتے ہیں، ہمیں ان پر اعتماد کرنا پڑتا ہے۔
