لاہور: فیڈرل بورڈ آف ریونیو (ایف بی آر) نے اسپننگ اور ٹیکسٹائل ملوں کی مانیٹرنگ کے لیے کیمرے نصب کرنے کا فیصلہ کیا ہے۔

اپٹما ذرائع کے مطابق ایف بی آر نے ٹیکسٹائل سیکٹر کو ہدایت دی ہے کہ ملوں میں کیمرے لگائے جائیں، جبکہ اسپننگ ملز مالکان کو اس حوالے سے سیلز ٹیکس انوائس بھی بھجوا دی گئی ہے۔

ذرائع کا کہنا ہے کہ ایف بی آر نے کیمرے نصب کرنے کا ٹھیکہ دو کمپنیوں کو دیا ہے، جو دو کیمرے لگانے کے 35 لاکھ روپے وصول کریں گی۔ مزید یہ کہ کمپنیاں سافٹ ویئر کے لیے الگ سے 20 لاکھ روپے سالانہ لیں گی، حالانکہ یہی سافٹ ویئر اور کیمرے بازار میں تقریباً آدھی قیمت پر دستیاب ہیں۔

اپٹما ذرائع کے مطابق معاملہ چیئرمین ایف بی آر کے سامنے اٹھانے کا فیصلہ کیا گیا ہے۔ اپٹما کا کہنا ہے کہ اتنی بھاری قیمت پر ملوں کا چلنا مشکل ہوگا اور بندش کا خدشہ ہے، کیونکہ ٹیکسٹائل سیکٹر پہلے ہی بجلی، ٹیرف، گیس اور ٹیکسوں کے بوجھ کے باعث نصف حد تک بند پڑا ہے۔