اسلام آباد میں وزارتِ خارجہ کے ترجمان طاہر حسین اندرابی نے پریس کانفرنس کے دوران کہا کہ دریائے چناب کے بہاؤ میں اچانک تبدیلی پاکستان کے لیے ناقابلِ قبول ہے۔ انہوں نے عالمی برادری سے مطالبہ کیا کہ بھارت کی جانب سے سندھ طاس معاہدے کی خلاف ورزی کا نوٹس لیا جائے۔
ترجمان نے کہا کہ بھارتی اقدامات خطے کے امن و استحکام کے لیے خطرہ ہیں اور دریاؤں سے متعلق کوئی یکطرفہ اقدام قابلِ قبول نہیں۔ انہوں نے مزید کہا کہ سندھ طاس معاہدے پر بین الاقوامی قوانین موجود ہیں اور بھارت کی خلاف ورزی تشویشناک ہے۔
طاہر حسین اندرابی نے بتایا کہ دسمبر سے دریائے چناب میں پانی کی سطح میں غیر معمولی اتار چڑھاؤ دیکھا گیا ہے، اور بھارت کی جانب سے بغیر اطلاع پانی چھوڑنے پر پاکستان کو شدید تحفظات ہیں۔
انہوں نے بھارتی ریاست بہار کے وزیراعلیٰ کی جانب سے ایک مسلم خاتون ڈاکٹر کے ساتھ ہتک آمیز سلوک کی بھی مذمت کی اور کہا کہ بھارت میں اقلیتوں کو ناروا سلوک کا سامنا ہے، بھارتی حکومت کو اقلیتوں کے حقوق اور مذہبی آزادی کا تحفظ یقینی بنانا چاہیے۔
سندھ طاس معاہدہ 1960 میں پاکستان اور بھارت کے درمیان عالمی ثالثی کے تحت طے پایا تھا، جس کا مقصد دریاؤں کے پانی کی تقسیم کو منظم کرنا تھا۔ پاکستان بارہا بھارت پر الزام لگاتا رہا ہے کہ وہ معاہدے کی خلاف ورزی کرتے ہوئے دریاؤں کے بہاؤ میں تبدیلی کرتا ہے، جس سے پاکستان کے زرعی اور معاشی نظام پر منفی اثرات مرتب ہوتے ہیں۔ حالیہ دنوں میں دریائے چناب کے بہاؤ میں اچانک تبدیلی نے پاکستان کے خدشات کو مزید بڑھا دیا ہے۔ اس کے ساتھ ساتھ بھارت میں اقلیتوں کے ساتھ ناروا سلوک کے واقعات بھی عالمی سطح پر تنقید کا باعث بن رہے ہیں۔
