پام بیچ، فلوریڈا — امریکی صدر ڈونلڈ ٹرمپ اور امریکی فوج نے اعلان کیا ہے کہ نائیجیریا کی حکومت کی درخواست پر شمال مغربی نائیجیریا میں داعش کے شدت پسندوں کے خلاف فضائی حملہ کیا گیا۔ ٹرمپ نے کہا کہ یہ شدت پسند مسیحی برادری کو نشانہ بنا رہے تھے۔

ٹرمپ نے سوشل میڈیا پلیٹ فارم "ٹروتھ سوشل” پر لکھا: "آج رات، بطور کمانڈر ان چیف، میری ہدایت پر امریکہ نے شمال مغربی نائیجیریا میں داعش کے دہشت گردوں پر طاقتور اور مہلک حملہ کیا، جو معصوم مسیحیوں کو بڑے پیمانے پر نشانہ بنا رہے تھے۔”

امریکی فوج کے افریقہ کمانڈ کے مطابق یہ کارروائی نائیجیریا کے صوبہ سوکوٹو میں نائیجیریا کی حکومت کے تعاون سے کی گئی، جس میں متعدد شدت پسند مارے گئے۔

نائیجیریا کے وزیر خارجہ یوسف مائیتاما ٹُگّر نے برطانوی نشریاتی ادارے کو بتایا کہ یہ ایک "مشترکہ آپریشن” تھا جو دہشت گردوں کے خلاف تھا اور اس کا کسی خاص مذہب سے تعلق نہیں۔ انہوں نے مزید کہا کہ یہ منصوبہ کافی عرصے سے تیار کیا جا رہا تھا اور اس میں نائیجیریا کی فراہم کردہ انٹیلی جنس استعمال کی گئی۔

یہ حملہ اس وقت ہوا جب ٹرمپ نے اکتوبر میں خبردار کیا تھا کہ نائیجیریا میں مسیحیت کو "وجودی خطرہ” لاحق ہے اور انہوں نے کہا تھا کہ اگر حکومت مسیحی برادری پر ہونے والے حملے نہ روک سکی تو امریکہ فوجی کارروائی کرے گا۔

نائیجیریا کی وزارت خارجہ نے کہا کہ یہ حملہ امریکہ کے ساتھ جاری سکیورٹی تعاون کا حصہ ہے، جس میں انٹیلی جنس شیئرنگ اور حکمتِ عملی کی ہم آہنگی شامل ہے۔ وزارت کے مطابق "اس تعاون کے نتیجے میں شمال مغربی نائیجیریا میں دہشت گردوں کے ٹھکانوں پر درست فضائی حملے کیے گئے۔”

پینٹاگون کی جانب سے جاری ویڈیو میں ایک جنگی جہاز سے میزائل فائر کرتے دکھایا گیا۔ امریکی دفاعی حکام کے مطابق یہ حملہ داعش کے متعدد کیمپوں کو نشانہ بنانے کے لیے کیا گیا۔

امریکی وزیر دفاع پیٹ ہیگسیتھ نے نائیجیریا کی حکومت کا شکریہ ادا کرتے ہوئے کہا کہ مزید کارروائیاں بھی متوقع ہیں۔

نائیجیریا کی حکومت کا کہنا ہے کہ شدت پسند گروہ مسلمانوں اور مسیحیوں دونوں کو نشانہ بناتے ہیں، اور صرف مسیحیوں پر حملوں کی امریکی دعوے پیچیدہ سکیورٹی صورتحال کی مکمل تصویر پیش نہیں کرتے۔

جمعرات کو نائیجیریا کے شمال مشرقی علاقے میں ایک مشتبہ خودکش حملہ آور نے مسجد میں دھماکہ کیا، جس میں کم از کم پانچ افراد ہلاک اور 35 زخمی ہوئے۔

نائیجیریا کے صدر بولا ٹینوبو نے کرسمس کے موقع پر اپنے پیغام میں کہا کہ ملک میں امن قائم ہونا چاہیے، خصوصاً مختلف مذاہب کے ماننے والوں کے درمیان۔ انہوں نے کہا: "میں مذہبی آزادی کے تحفظ اور تمام نائیجیریائی شہریوں کو تشدد سے بچانے کے لیے ہر ممکن اقدام کروں گا۔”